Kazu Raikotu, PNTL Detein Suspeitu Na’in 1

DILI (Timoroman) – Suspeitu na’in ida, ne’ebé PNTL hetan kaer iha akoñtesementu Raikotu, Sesta (03/03) liubá, agora detein hela iha sela PNTL Munisípiu Dili.

“Suspetu na’in ida ami deten hela iha ne’e. Prosesu hodi tama ba primeiru interogatoriu la’o daudauk ona. Na’in 5 seluk ami identifika ona. Hein de’it, mandatu kapturasaun hosi Tribunál Distrital Dili,” hatete Segundu Komandante PNTL Munisípiu Dili, Superintendente Assistente Euclides Belo ba jornalista, Segunda (06/03).

Ninia parte, Euclides dehan, hein de’it desizaun hosi Tribunál Distrital Dili atu bele foti desizaun. Maski, PNTL deskonfia katak iha suspeitu balun ne’ebé mak sai autor hosi konfrontus ne’e.

Hatán kona-ba mandatu kapturasaun ba PNTL, ne’ebé bele identifika apoiantes hosi kanditura PR ida ne’ebé mak inklui iha akoñtesementu Raikotu ne’e, Euclides dehan, kazu ne’e sei liuhosi prosesu investigasaun.

Iha sorin seluk, Xefe Suku Comoro Eurico da Costa deskonfia Grupu Arte Marsiais (GAM) mak asalta malu, tan de’it problema iha pasadu nian.

“Ha’u deskonfia, GAM mak aproveita situasaun kampaíña hodi estraga fali komunidade nia uma hamutuk 36, nomós sasan sira seluk,” dehan Xefe Suku Comoro Eurico da Costa, liuhosi konferensia imprensa iha Raikotu, Sábadu (04/03).

PDHJ Simu Informasaun

Provedor Interinu PDHJ nian, Horacio de Almeida dehan, ninia parte simu ona informasaun kona-ba situasaun ne’ebé akoñtese iha Raikotu, Sesta (03/03) lorokraik.

“Loos duni. Ha’u mós simu telefone hosi komunidade iha área ne’ebá. Sira informa kona-ba situasaun ne’ebé akoñetese iha fatin refere,” Horacio hatete, Segunda (06/03) iha edifísiu PDHJ, Kaikoli, Dili.

Nia dehan, ekipa hosi PDHJ Munisipiu Dili, halo ona intervista ho komunidade sira ne’ebé iha area Raikotu nian, atu buka informasaun ne’ebé kle’an liu. No PDHJ sei prepara relatoriu kona-ba ida ne’e.

Iha sorin seluk, Comisão Nasionál Eleisão (CNE), konvoka ona reuniaun ho ekipa susesu hosi parte hotuhotu, kona-ba kazu violensia ne’ebé mak akoñtese iha Raikotu.

“Kazu Raikotu iha hela situasaun kontroladu hosi parte polísia. To’o bainhira CNE konvoka kedas ekipa susesu hosi parte kandidatu sira, para bele halo kedas deklarasaun katak sira tenke kondena aktus ida ne’e,” esplika Prezidenti CNE, Alcino Barris liuhosi konferensia da imprensa iha salaun CNE, Segunda (06/03).

Observadór Polítika Universidade Nasionál Timor-Leste (UNTL), Camili Ximenes dehan, tenke halo edukasaun polítika ba militante. Atu nune’e, bele eduka militante sira hodi bele hatene sira nia papel. “Akoñtesementu ne’e mosu, rezulta ema ninia sasan barak mak rahun. Inklui mós karreta. Presiza iha edukasaun polítika ne’ebé di’ak ba militante no mós apoiantes hosi kandidatu PR sira,” Camili dehan.

Entretantu, Prezidente Komisaun B Parlamentu Nasionál (PN), David Dias Ximenes hatete, seguransa di’ak, kuando medida preventiva.

“Tinan-tinan ha’u sempre ko’alia. Ita tenke ko’alia kona-ba seguransa. Seguransa ne’ebé di’ak, kuandu medida preventiva mós di’ak. La’ós medida represiva de’it,” haktuir David Ximenes.

Iha fatin seluk, Diretór Ezekutivu Organizasaun Non Govermentais (ONG) Luta Hamutuk Mericio ‘Akara’ hatete, kazu Raikotu ne’ebé akoñetese Sesta (03/03) akoñtese entre militantes Fretilin ho komunidade sira. Ida ne’e, responsavel lideransa máximu sira nian.

“Lideransa ne’ebé loos mak bainhira halo komprimisiu iha públiku, fila ba hatete kedas ba nia elementus katak nia halo ona komprimisiu ba públiku. Ne’ebé nia iha komitmentu atu lakohi halo violensia. Entaun militantes sira ne’ebé tuir nia, labele halo violensia,” Mericio enkoraja. (sal/viq/mey/anu/mj2)

Leave a Reply

Your email address will not be published. Required fields are marked *