Taur: “Ha’u Nia Partidu Mak PLP”

BAUCAU (Timoroman) – Duvida ne’ebé durante ne’e halo ema barak konfunde, hetan duni nia resposta. Taur Matan Ruak, atuál Prezidente da Repúblika deside ona, nia partidu mak Partidu Libertasaun Populár (PLP).

“Ha’u nia partidu mak Partidu Libertasaun Populár (PLP). Kuandu manan, ha’u mak ukun iha Governu. Ha’u sei raut (kompete, red.) malu ho Partidu CNRT no Fretilin. Ha’u tenke hatete sai de’it ona. Subar beibeik mós ladi’ak,” afirma PR Taur Matan Ruak iha dialogu hamutuk ho komunidade Suku Bahu, Posto Administrasaun Baucau Vila, Munisípiu Baucau, Sesta (03/03).

PR Taur hatete sai ninia ‘segredu’ durante ne’e, bainhira hatán ba perguntas ne’ebé Ruta Avulyte Jelage, observadór Eleisaun Presidente da Repúblika hosi Komisaun Uniaun Europeia nian.

“Iha tempu badak, ha’u sei públika kona-ba fó apoiu konfiansa ba kandidatura PR periode 2017-2022 na’in 8, ne’ebé mak oras ne’e daudaun, namanas hela halo sira-nia kampaiña ba eleisaun presidensiál nian,” nia hateten.

Agora, tuir PR Taur, nia seidauk dehan. Tanba, nia seidauk akompaña kandidatu na’in 8 nia programa. Tan ne’e, nia hakarak haree lai programa hosi kandidatu PR sira. “Kandidatura ida ne’ebé maka ninia programa ne’e, besik ho hau nia programa. Maibé, Sesta ka Sabadu hanesan ne’e, hau sei hatete iha televizaun,” dehan PR Taur.

Alende ne’e, eis Xefi Estadu Maior Jeneral das F-FDTL ne’e informa katak nia sei lakohi atu re-kandidata an ba kargu Prezidente da Repúblika. Razaun katak, diak liu nia sai rasik hosi kargu ne’e, do que ema maka duni nia sai.

“Ha’u kuandu iha uma, ha’u ho hau nia kaben no hau nia oan sira, haree televizaun. Ami hadau malu sofa. Ida dehan, fatin ne’e ha’u nian! Ida fali dehan, fatin ne’e ha’u maka tuur uluk. Entaun, ha’u lakohi hatoman hau nia-an nu’udar Prezidente da Repúblika. Ha’u hakarak mandatu to’o tinan lima de’it,” PR Taur fó ezemplu.

Tuir PR Taur, mandatu tinan lima ne’e onra boot, ne’ebé maka povu oferese ba nia. Tan ne’e, nu’udar Prezidente da Repúblika, Taur agradese ba povu ninia konfiansa ne’e ba nia. (viq)

Leave a Reply

Your email address will not be published. Required fields are marked *