Xanana: Lú-Olo Tenke Tuur Iha Aitarak Laran

ERMERA (Timoroman) – Eis Prezidente da Repúblika, Kay Rala Xanana Gusmão hatete, kandidatu Prezidente da Repúblika Francisco Guterres Lú-Olo, tenke ba tuur iha Palasiu Prezidente Aitarak-Laran.

Lia hirak ne’e, Xanana haklaken bainhira sai nu’udar oradór ba kampañia dahuluk hosi kandidatu númeru 2, Francisco Guterres Lú-Olo iha kampu futeból, Gleno, Munisípiu Ermera, Kinta (03/03).

Xanana dehan, sira ne’ebé la tuir kampañia no iha hela uma, hatene katak iha dia 20 de Marsu, sei vota ba númeru 2. “Loron 20 de Maiu tinan ida ne’e, ita hotu hatene katak Lú-Olo sai Prezidente da Repúblika no sei simu nia knaar, nu’udar Prezidente da Repúblika,” Xanana haklaken.

Eis Primeiru Ministru ne’e mós dehan, Timor-Leste presiza ema ida ne’ebé tenke ba tuur iha Palasiu Aitarak-Laran, para bele haree oinsá bele asegura Estadu ida ne’e, la’o ba oin.

“Lú-Olo, Prezidente Asemblea Konstituante ne’ebé hakerek ona Konstitusaun RDTL. Lú-Olo, Prezidente Parlamentu Nasionál durante tinan 5. Ida ne’e hatudu katak, ita fó fiar ba nia. La’ós de’it tan ita gosta nia no la’ós tanba nia Prezidente Partidu Fretilin. Ita fó fiar ba nia, tanba ita hatene katak bainhira nia sai prezidente ho prezidente ida ne’ebé loloos,” afirma Xanana Gusmão.

Eis gerrilleiru ne’e mós subliña, Prezidente da Repúblika (PR) nu’udar simbolu ida katak, PR mak fó imajen ba unidade nasionál. Labele fahe ema. PR tenke hamriik metin atu dehan ba povu tomak no organizasoens. Polítika ka la’ós polítika, tenke hamutuk hodi haree ba rai ida ne’e. Povu ida ne’e.

Xanana haklaken, PR mak reprezenta Estadu ba mundo. “La’ós suku ba suku. Ita ko’alia tenke ho lia loos. Labele hirus malu. Maibé, iha demokrasia nia laran, la’ós ita hotu han bosu tiha, hakilar de’it.”

Tan ne’e, Xanana husu ba povu Timor-Leste tomak, liuliu iha Munisípiu Ermera atu bainhira vota, tenke vota ba númeru 2. Tenke manan. Tanba, ho hamutuk ita bele. “Ha’u mai, la’ós halo kampañia. Maibé, ha’u mai nu’udar maun ida ba irmaun Lú-Olo. Nu’udar maun ho fali alin ba Sekretariu Jerál Partidu Fretilin, Mari Alkatiri,” nia dehan.

Iha fatin hanesan, kandidatu PR Francisco Guterres Lú-Olo hateten, nia mai hamriik iha saudozu Nino Conis Santana nia rate leten, ba dala ida tan. Atu kasu hela lia fuan ikus, atu lori nia ba Palasiu Prezidente Aitarak-Laran.

“Ha’u haree ita iha ne’e kór oioin, ou kór ketak-ketak. Buat ne’ebé ha’u la hetan iha tinan 5 ba kotuk no tinan 15 ba kotuk. Maibé, ha’u sente haksolok boot tebetebes. Tanba ita hotu hasoru malu, para husik hela komprimisiu no lori ha’u Lú-Olo ba Aitarak Laran,” tenik Lú-Olo.

Eis Prezidente Parlamentu Nasionál ne’e dehan, onra bo’ot tebes ba nia hodi rona lia fuan murak hosi Xanana no Mari Alkatiri ho sira-nia mensajen ne’ebé hodi fó apoiu ba Lú-Olo, atu manan duni. Tenke manan duni.

“Ha’u nia komprimisu dahuluk mak atu hametin paz no estabilidade iha ita nia rain. Atu garante no hametin unidade povu TL nian. Atu hala’o dezenvolvimentu ba ita nia rain. Dezenvolvimentu atu bele buras, presiza halibur ita nia vontade tomak,” hatete Lú-Olo. (rys)

Leave a Reply

Your email address will not be published. Required fields are marked *