Lere : “Militar La’os Funsionariu Públiku”

Timoroman.com – Servisu Militar la hanesan ho Funsionariu Publiku, tan ne’e hakarak sai ona militar tenke prontu servisu durante oras rua nulu resin hat (24) nia laran hodi servi povu no rai ida ne’e.Maior Jeneral FALINTIL-Forsa Defeza Timor Leste (F-FDTL), Lere Anan Timur hateten atu sai Polisia Militar (PM) tenke servisu 24 oras, la’os hanesan fali funsionariu públiku hodi servisu konforme ida-idak nia hakarak.

“kuandu sai ona forsa tenke prontu servisu 24 oras iha militar nian laran, liu-liu ba imi Polisia Militar tenke servisu ho profesionalimu no servisu ho displina.” dehan Maior Jeneral, Lere Anan Timur bainhira hala’o diskursu iha aniversariu Polisia Militar ba dala 12, Sesta-Feira (20/01).
Lere haktuir, forsa ida agora mesak jerasaun foun de’it, ne’e duni tenke hatudu displina servisu militar nian, tanba militar la’os hanesan servisu funsionariu publiku ne’ebé servisu tuir oras servisu nian.

Bainhira sai ona militar depois involve tan iha Polisia Militar tenke kumpri servisu hanesan lutu ba nasaun no prontu atu servi 24 oras la’os atu halo tuir fali hanesan funsionariu publiku sira.
Lere mós apela ba membru F-FDTL ne’ebé mak lakohi servisu di’ak liu sai tiha hodi bele ba buka servisu iha fatin seluk, sekarik sente katak servisu militar ne’e todan. “Ha’u komanda iha forsa tolu, Polisia Militar, Forsa Ofisiais no Fuzileiros. Husi forsa tolu ne’e tenke kumpri regra militar nian hodi servisu 24 oras, maibé ba se mak la aseita tenke sai, liu-liu ba komandante sira tenke hatudu ezemplu ne’ebé di’ak ba membru sira.” tenik Lere.

Sai polisia militar la’os sabraut fali depois balun halo jagoan iha bar nomos halo problema tun sae. Polisia Militar tenke hatudu ezemplu ida ne’ebe mak di’ak, tan ne’e mak komandante sira tenke kontrola ninia membru sira.

Lere hatutan, iha Kaurtel Metinaru kuandu tama ona Sesta-Feira husi soldadu to’o ba komandante sira nadodon tun mai Dili, entaun ida ne’e hatudu ezemplu ne’ebé mak la di’ak ba povu.

Lere mós husu ba membru F-FDTL sira bainhira uza kareta estadu tenke la’o tuir regras displinar militar nian, la’os dehan forsa ne’e duni lori kareta konforme idak-idak nia hakarak depois la kuidadu kareta hirak ne’e no la to’o fulan ida ka rua kareta hirak ne’e a’at fali ona.

“Ha’u hanoin hahalok hirak ne’e labele akontese, tanba estadu hadomi instituisaun F-FDTL mak oferese kareta, ne’e duni husu ba soldadu no komandante sira tenke kuidadu kareta estadu hanesan ita nia a’an rasik.” Lere husu (anu)

Leave a Reply

Your email address will not be published. Required fields are marked *