Marvi Agradese Ba Timor Oan Tomak Nia Apoiu

Timoroman.com- Aman husi artista Timor oan, Maria Vitoria ne’ebe oras ne’e daudaun kompete iha Dandut Akademi Asean 2 iha Indonesia hato’o nia agradesimentu ba Sekretariu Estadu Joventude desportu (SEJD) ho povu Timor Leste tomak ne’ebé mak fó ona apoiu ba ninia oan (Maria Vitoria).

Antonio Borges (Maria Vitoria nia aman) hateten, masi iha tempu pasadu halo atividade negosia fa’an kankun, maibé sente orgullu tanba Marvi bele hakat ba iha 12 besar hafoin kompete ho nia maluk nain rua husi Indonesia no Malaysia.

“Ohin ha’u mai iha ne’e (SEJD) tanba Marvi mak haruka. Nia dehan, Apa ba Timor karik tenke hakat ba SEJD hodi hato’o ha’u nia agradesementu no komprimentus ba Sua Exelensia, tanba organiza ona komunidade hodi nonton hamutuk. Ema hotu hatene ha’u moris husi familia kbit laek ida, hau ema ida ne’ebé fa’an kankun, maibe ema boot ida bele hader to’o kalan boot atu nonton hau.” Antonia konta tuir Marvi nia lafuan ba Jornalista sira iha Edifisiu Sekretariu Estadu Juventude Desportu (SEJD) (30/11).

Antonio haktuir, SEJD mós haksolok tebes ho Marvi no SEJD premete karik Marvi liu tan faze ida ne’e nia sei ba asiste to’o iha Indonesia iha Estudiu 5 Indosiar.

“uluk kedas hau fo hatene ba Marvi katak, se ita boot ba duni compote iha pangung Indosiar nian masmu atu lakon iha etapa permeiru mos hau kontenti ona, satan agora nia liu kedan faze tolu.” tenik Antonio.

Liu husi biban ida ne’e, aman husi artista Timor oan ne’e husu ba maluk Timor tomak ne’ebé hela iha Timor, Indonesia nomós nasaun seluk atu reza nafatin ba Maria Vitoria atu bele hetan susesu iha kompetisaun Dandut Akademi.

“Ha’u nia oan (Marvi) ko’alia iha televisaun hanesan ita boot sira hatene, ami ne’e ema kbit laek, ha’u bele ba asiste hau nia oan iha ne’eba mos husi Ministru Turismu Arte Kultura mak suporta.” esplika Antonio .(mar)

Leave a Reply

Your email address will not be published. Required fields are marked *