Refujiadu Husu Fila, Lere : “Ha’u La Konkorda”
Timoromna.com– Maior Jeneral FALINTIL-Forsa Defeza Timor Leste (F-FDTL), Lere Anan Timur la konkorda maluk refujiadu iha Timor Osidenta ne’ebé uluk lakohi Timor-Leste ukun rasik an atu fila mai.
“Ha’u la konkorda sira fila mai iha Timor Leste, tanba uluk ne’e la iha ema ida mak haruka sira ba refuziadus iha Indonesia.” dehan Major Jeneral, Lere Anan Timur iha ninia diskursu bainhira partisipa seremonia rekoila restu mortais iha Munisipiu Ainaro, Segunda foin lalais (14/11).
Lere haktuir, bainhira nia ba Jakarta (Indonesia) hodi hasoru malu ho Eurico Guterres no iha momentu ne’ebá Eurico husu ba Jeneral Lere katak, “ maun bainhira mak ami fila ba Timor Leste, maibé Lere responde, uluk la’os ami mak haruka imi mai iha Indonesia, mais atu ba iha Timor Leste tenke hanoin didi’ak ba imi nia sala hirak ne’ebe mak husik hela ba Timor oan sira.”
“Se karik imi hakarak duni atu fila ba Timor Leste, ida ne’e hanesan problema bo’ot ida tanba povu Timor – Leste hatene katak imi sira ne’e mak uluk lakohi ukun a’an hodi halai tiha ba Indonesia.” Lere konta tuir
Se kuandu hakarak mai tenke mai vizita de’it familia fila fali ba Indonesia, maibé se kuandu ita simu fali refuziadus sira entaun husi nasaun vizinu bele ukun tan Timor Leste (TL). Nia hatutan, ita nia Governu mak sala hodi husik refuziadus tama iha Timor Leste hodi bele fó tempu ba sira atu bele hari tan partidu ikus mai hetan tan kadeira.
“Agora Governu tenke hare liu ba veteranus ne’ebe mak balun sei terus no mukit hela, la’os ba preokupa fali autonomista sira ne’ebe mak uluk la gosta Timor ukun a’an.” tenik Lere (Anu)
