Kazu Lospalos Ho Oe-cusse, Lere: “Kuandu Grave Ha’u Toma Desizaun”

Timoroman.com-Kazu ne’ebé komete husi oknum membru FALINTIL Forsa Defeza Timor-Leste (F-FDTL) iha Munisipiu Lautem no Oe-Cusse, oras ne’e daudauk iha ona prosesu investigasaun, ne’e duni kuandu rejultadu investigasaun hatudu kazu ne’e grave, Komandu F-FDTL sei foti medidas ne’ebé todan.

Maior Jeneral F-FDTL, Lere Anan Timur hateten, nia parte seidauk hare prosesu tomak husi kazu hirak ne’e. Tan ne’e, desizaun hotu-hotu sei foti bazeia ba kazu ne’e ninia grau  todan ka Kaman.

“Ha’u seidauk hare nia prosesu tomak, maibé se ita hare grau de compatibilidade ba kazu ne’e todan ka kaman, hafoin mak ita toma desizaun.” Dehan Maior Jeneral Lere Anan Timur ba Jornalista sira iha Palasiu Presidente Republika Ai-Tarak Laran, Kinta-Feita, (17/11).

Mesmu nune’e, Maior Jeneral Lere informa katak, se karik kazu Lospalos nian mak , justifika membrus forsa armadas ne’e ameasa tiru duni kilat entaun kazu  ne’e todan, nune’e mós kazu iha Oe-Cusse nian mak justifika oknum membru F-FDTL na’in 6 lori kilat ba asaltu Kuartel Polisia nian entaun ida ne’e todan.

Lere haktuir, kazu ne’e la’os ema ida ka rua de’it mak involve, maibe kazu iha Oe-Cusse ne’e deskonfia oknum membru F-FDTL na’in 6 mak involve, iha Lospalos ema nain 2 mak involve nomos sei iha tan problema seluk, ne’e duni atu prosesa kazu hirak ne’e sei lori tempu naruk.

Husu kona ba sansaun saida mak parte komandu sei foti, maibé Jeneral Fitun Rua ne’e responde, sei hare ba prosesu tomak husi kazu hirak ne’e nomós ninia rejultadu investigasaun. “ ha’u sei toma desizaun tuir kazu ne’e ninia gravidade. Ne’e duni, se kazu ne’e kaman medidas ne’ebé atu foti mós kaman ba sira, maibé se karik kazu ne’e todan entaun medidas ne’ebé atu foti mós todan ba sira.” esklarese Lere.

Iha biban ida ne’e, eis gerileirus FALINTIL enkoraza mós membru F-FDTL jerasaun foun sira tenke sai militar ne’ebé professional no tenke hakruk ba regulamentu disiplinar militar nian, tanba uluk tama iha militar laiha ema ida mak obriga. (ViQ)

Leave a Reply

Your email address will not be published. Required fields are marked *