Suspeitu Oho Madre Hetan TIR

Timoroman.com – Komandante Polisia Nasional Timor Leste (PNTL) Munisipiu Viqueque, Superindenti Xefe Antonio Mauluta hateten, suspeitu ho inisial (R) ne’ebé deskonfia oho Madre, Luisa de Deus daudauk ne’e hetan Termus Identidade Rezidensia (TIR).

Suspeitu agora daudauk fila fali ona ba Konventu Franciscana Cordio Jesoet Maria (FCJM) iha Munisipiu Viqueque.

Komandante (PNTL) Munisipiu Viqueque, Superindenti Xefe Antonio Mauluta ba Diariu Timoroman liu hosi via telefone hateten, suspeitu ne’ebé deskonfia oho madre Luisa agora hetan hela TIR.

“Rezultadu invetigasaun seidauk indentifika katak, suspeitu ne’e mak oho duni Madre Luisa ka lae, maibe polisia sei esforsu nafatin hodi bele identifika loloos motivu husi kazu ne’e.”dehan Superindenti Xefe Antonio Mauluta.

Entertantu Bispu Diocese Dili, Dom Virgilio do Carmo da Silva hateten, oras ne’e daudauk Polisia kaptura ona suspeitu nain rua ne’ebe mak deskonfia oho madre Luiza. Suspeitu sira hela duni konventu refere no prosesu ba kazu agora daudauk iha hela prosesu investigasaun nia laran.

“mate isin Madre Luisa de Deus agora tau hela iha seminariu Malo’a Ailok Laran, depois sei lori ba halo’ot iha Becuse Becora nian. ita Ita mós seidauk hatene lolos husi kazu ne’e, tanba seidauk iha desizaun final.” dehan Bispu Virgilio ba jornalista sira iha IEC Balide Dili, Tersa-Feira (15/11).

Bispu haktuir, bainhira hetan tiha Madre nia mate isin, urugentemente evakua kedas mai iha Hospital Nasional Guidu Valadares (HNGV) hodi halo prosesu autopsia. Ne’e duni, buat hotu ita entrega ba Maromak tanba madre nia mate ne’e hanesan mizerikordia ida.

Iha parte seluk Komandante Opersaun PNTL, Superintendenti Xefe Henrique da Costa hateten, bazeia ba relatoriu ne’ebe hato’o husi Komandante Munisipiu Viqueque katak, madre ne’e mate tanba deskonfia ema oho.

Mesmu nune’e, ita seidauk hatene loloos motivu husi kazu refere, maibe polisia kontinua nafatin halo prosesu ba kazu ne’e.

PN Husu Investiga Autor Oho Madre

Membru Parlamentu Nasional kondena makas aktu ida ne’e no husu ba PNTL atu investiga klean autor ne’e.Prezidente PN, Adérito Hugo da Costa husu ba PNTL atu halo investigasaun klean hodi bele hatene motivu husi akontesimentu ida ne’e.

“Ita iha ajensia Polísia Investigasaun Kriminal atu bele hare kazu ida ne’e, nia (Madre Lucia-read) mate tanba nia aan rasik hakarak ka keta iha aktus krimi ruma hasoru madre.” lamenta Prezidente PN, Adérito Hugo da Costa iha PN, Tersa (15/11).

Deputadu Bankada Frente Mudansa, José Luis Guterres sente triste bainhira simu informasaun katak, Madre Lucia de Deus mate iha rai Viqueque.

“ha’u triste tebes tanba madre sira nia misaun ida pas no missaun rekonsiliasaun no domin nian, maibé doloroju tebes bainhira hare nia mate.”dehan José Luis.

Iha biban ida ne’e, Deputadu ne’e husu ba komunidade tomak atu reza ba maromak no matebian sira hodi simu matebian madre Luiza iha ninia kadunan santa.

Madre Lucia de Deus husi Munisípiu Ermera, tanba ne’e José Luis Guterres nu’udar mós Viqueque oan dehan, insidente ne’e sei la fó impaktu ba relasiona entre Munisípiu Ermera hó Viqueque tanba mesak Timor-oan de’it.

Aleinde ne’e, Membru Deputadu bankada FRETILIN, Manuel Castro hateten, madre Lucia de Deus mate tanba iha suspeitu balun mak hasai madre Lucia nia vida, tanba ne’e suspeitu iha ona prosesu investigasaun nia laran.

“Ita sarani tomak povu Timor-Leste sai hanesan ita nia tradisaun ida, tanba ne’e ita tenke fó respeitu masimu ba ita nia lideransa husi relijiaun ninian,”sujere Deputadu Manuel Castro ba sarani hotu.

Vice Ministra Edukasaun (ME), Dulce Jesus Soares hatete, Ministeriu Edukasaun  to’o oras ne’e seidauk simu informasaun katak, deskonfia estudante oho Madre Luisa de Deus iha Munisipiu Viqueque.

“Ha’u seidauk hetan informasaun lolos konaba ida ne’e, se bainhira estudante ida maka halo assaun ida ne’e ME sei toma atensaun ba situasaun ida ne’e atu reforsa liu tan iha eskola liu husi professores sira oinsa mak atu eduka oan sira ho diak liu tan,”

Prosesu autopsia ba mate isin madre Luisa felismente remata ona no agora daudauk mate isin entrega ba parte familia no Orfonatu Santa Klara hodi lori Ailok Laran.
Maski prosesu autopsia remata ona, maibé husi parte ekipa forensic seidauk iha esplikasaun klaru kona ba kauza ida ne’e, tanba xefi forensik la iha fatin.(Anu/jax/Cin/MJ1)

Leave a Reply

Your email address will not be published. Required fields are marked *