PNTL Rezista Asidenti Trafiku 1.540

Timoroman.com– Relatoriu Polisia Nasional Timor-Leste (PNTL) hatudu katak, iha fulan sanulu (10) nia laran hahú husi fulan Janeiru to’o Outobru tinan ida ne’e, PNTL konsege rezista kazu asidenti trafiku hamutuk 1.540 .

Komandante Jeral PNTL, Komisariu Julio da Costa Hornay hateten, husi total kazu asidente trafiku ne’e hamutuk 1.274 hetan kanek kaman, kanek todan 112 no sira ne’ebé mak lakon vida hamutuk 56.

Kauza husi asidenti trafiku hirak ne’e mai husi fatores humanu (kelelayan) nomós balun la kumpri regras tranzitu ne’ebé mak lei kodiku estrada aplika tiha ona iha Timor Leste. Relasiona ho kestaun hirak ne’e, Komandante Jeral PNTL husu ba kondoutores no motorist sira atu kumpri regras tranzitu nian no labele lori kareta no motor iha kondisaun lanu (hemu tua).

“Hanesan kondoutores tenke iha responsabilidade ba pasajeirus nia vida, ne’e duni tenke evita hahalok ne’ebé fó ameasa ba ema seluk nia vida hanesan hemu tua hodi lori kareta.” dehan, Julio da Costa Hórnay ba Jornalista iha Kuartel Jeral PNTL Kaikoli, Segunda-Feira (14/11).

Numeru asidente ne’e boot tebes ne’e duni tenke prevene agora. Komandante ne’e husu mós ba sidadaun hotu ne’ebé uza transporte tenke iha konsiensia hódi halai neneik para redus tiha asidenti ne’ebé mak sempre akontese.

“Ita hotu tenke hadomi ita nia a’an rasik, tanba ema moris ne’e dala ida de’it ne’ebé mak moris ona tenke kuida a’an hodi bele senti mundu nia furak, la’os halai motor ka kareta konforme idak-idak nia hakarak.” tenik Hornay hodi taka ninia liafuan.(anu)

Leave a Reply

Your email address will not be published. Required fields are marked *