Governu La Tolera Korupsaun Iha Alfandega

Timoroman.com– Governu liu husi Ministeriu Finansas (MF) sei la tolera pratika korupsaun ne’ebé mosu iha instituisaun Alfandega.

Korupsaun hanesan virus ida, ne’e duni tenke kombate, se la’e bele estraga ejistensia Governasaun. Ne’e duni, iha semana kotuk Konsellu Ministru aprova ona rezolusaun ida hodi adopta deklarasaun Arusa para bele kontrola servisu instituisaun Alfandega nian.
Vise Ministru Finansas, Helder Lopes hateten, deklarasaun Arusa ne’e atu garantia boa governasaun no integridade servisu Alfandega nian, tanba Governu l tolera korupsaun mosu iha Alfandega.

“Governu la tolera korupsaun mosu iha Alfandega, ne’e duni Governu kompremetidu tebe-tebes atu kombate korupsaun iha Alfandega.” dehan Vise Ministru Finansas, Helder Lopes iha ninia deskursu hafoin intrega sertifikadu ba despaxante sira iha edifisiu Alfandega Kolmera, Segunda-Feira (14/11).

Mesmu Governu iha komprimisiu bo’ot atu kombate korupsaun, maibé tuir Vise Ministru Finansas katak, atu kombate korupsaun iha Alfandega entidades hotu-hotu tenki servisu hamutuk.

“Ami iha esperensia, tanba dala barak ami rona dehan Alfandega halo korupsaun, maibé ida ne’e dala ruma presepsaun publiku nia de’it.” tenik Helder.
Kuandu funsionariu Alfandega ida mak komete kazu korupsaun hodi fasilita A, B no C entaun husu bele hato’o keisa no fó funsionariu ne’e nia naran, atu nune’e bele halo investigasaun.

“ Se ita levanta kazu ida ne’e mais lakohi atu fo naran, hanusa  mak ita bele kombate korupsaun sekarik ita bo’ot hateten nia halo korupsaun maibé atu relata de’it nia naran mós la brani.” kestiona Helder.

La Garante Servisu Alfandega Sei Hapara Lisensa Broker

Diretur Jeral servisu Alfandega, José Abilio hateten, Broker tenki garante servisu Alfandega nian, se la’e Alfandega sei halo kanselamentu ba ninia lisensa.

“Presiza iha integridade husi ita bo’ot sira hodi bele garante servisu Alfandega nian, tanba Alfandega tenta atu garante servisu ho professional.  Ita bo’ot sira hanesan broker hala’o funsaun Alfandega nian, ne’e duni ita bo’ot sira tenki garante Alfandega nia servisu no tenki garante mos hanesan asosiasaun Despaxante nian, Kuandu ita boot sira la garanre maka iha evidensia ruma, ami sei foti asaun ka sansaun ba ita bo’ot sira.” dehan José Abilio iha serimonia intrega sertifikadu ba Despaxante iha edifisiu Alfandega, Kolmera, Segunda-Feira (14/11).

José haktuir, kuandu akontese manobra ruma, otomatikamente ami iha poder halo kanselamentu ba iha broker sira nia lisensa.

“Ita tenki hatudu ita nia professional nafatin para bele asegura katak servisu ne’ebe ita halo ne’e la’o di’ak no ita lakohi atu importadores sira husi rai seluk bainhira importa sasan to’o iha Timor hetan fali problema.” esklarese José.
Lisensa ne’ebe mak despaxente sira uza la’os de’it estandar nasional, maibe tama ba iha estandar internasional.

Iha fatin hanesan, Vise Ministru Finansas, Helder Lopes dehan, broker nia papel ne’e imporatnte tebe-tebes ho reforma fiskal ne’ebe mak Governu halo, ne’e duni agora ba oin broker sira tenki iha sertifikadu.

Sira ne’ebé iha sertfikadu mak servisu ho Alfandega no ba sira ne’ebé la iha sertifikadu labele, tanba iha nasaun hotu-hotu broker tenki iha sertifikadu.
Vise Ministru mós husu broker sira ne’e tenki uniforma para bele la’o ho organizadu.
“dala ruma ema ida mai hamirik de’it iha ita nia oin nia hasai dokumentus foin mak ita hatene nia broker.” esplika Helder. (sal)

Leave a Reply

Your email address will not be published. Required fields are marked *