Hong Long Investe $100 Miloens Iha Industria Peskas

Timoróman.com – Kompañia Hong Long Fisheries husi China   mai investe iha Industria  Peskas  ho orsamentu $ 100 Miloens.

Governu Timor  Leste  liu husi Ministeriu Agrikutura no Peskas (MAP) dadaun ne’e fo ona  licensa ba kompañia Hong Long Fisheries  Lda, mai ho ró 15 husi  China oras ne’e to’o ona iha Timor  atu   investe iha area industria peskas .

Tuir Diretor Geral Peskas Acaçio Guterres informa ba Diariu Timoroman katak, ró  hamutuk 15 mak to’o  iha Timor agora dadaun para iha area tasi Cristo Rei nian.

“Ita hare’e  ró nia modelo hanesan hotu,  ho ró ne’e mak  sira sei utiliza    hala’o atividades kaer ikan iha parte sul tasi mane, ne’e duni agora dadaun  husi parte tekniku sira sei hala’o inspeksaun iha ró leten, hafoin hare’e ba dokumentus ró ne’ebé maka kompletu ita bele hasai ona licensa hodi bele ba kaer ikan,” esklarse  Acaçio Guterres ba Diariu Timoroman, bainhira remata enkontru ho parseria sira iha salaun MAP Comoró- Dili, Kinta (10/11).

Nia mos esplika  kona ba prósesu dokumentos kaer ikan nian remata ona,  hein deit  hasa’i licensa ba sira  para  kaer ikan. Maibe, aktividade parte rai maran mak sei hein hela kontratu rendementu husi terras própriedade ba kompañia para hala’o servisu iha rai maran nian.

Nune’e mos  tempu  badak  husi MAP  sei hasai licensa  ba sira hahu kaer ikan. Nomos ró 15 sei atraka iha  Kairabela-Vemasse tanba ninia baze de industria pescas iha ne’eba.
Ne’e duni Ministeriu  hasai ona autorizasaun atu ró  refere sei kaer ikan iha parte Sul Tasi Mane nian , sei  prósesu iha Timor Leste  hafoin esporta ba rai liur.

Entertantu Kompañia  Hong  Long Fisheries  mai husi   própinsia  FU JO-China hodi  halo atividade  peskas iha tasi Timor.

“Ita laiha akordu espesifiku, maibe bazeia ba Dekretu Lei Peskas no 4/2014  ne’ebé maka vigora.  Tan ne’e Ministeriu  mós fo ona autorizasaun,” relata  Acaçio.

Parte seluk Diretor Geral Peskas  subliña, husi MAP halo tiha ona akordu ho SEPFOPE rekruta tiha ona ema ne’ebé servisu iha ró laran hamutuk 75, ne’e involve Timor oan deit.

Husi ema nain 5 ne’e sei servisu iha kada ró ida, tanba komapañia nain ho SEPFOPE no dirasaun peskas nian ohin komesa halo orientasaun ba trbaladores ne’ebé servisu iha ró leten, katak sira nia dever servisu no obrigasaun.Tanba Kompaña  Hong  Long Fisheries  sei servisu iha Timor Leste  ho  durasaun tinan  30 ba longu  prazu,tanba  sei halo konstrusaun fabrika iha Vemasse no  presiza tan rai 100 hektares atu bele hakiak ikan no boek.

Nune’e husi MAP  presiza fo apoiu ba sira, atu involve mos komapaña lokal sira maibe  sei hare’e sira nia dokumentos karik presiza sira rekursu deit, para ajuda malu hodi servisu hamutuk para dezenvolve setor pescas iha Timor Leste.
Atu nune’e to’o tempo kompañia sira fila, emprezariu  timor oan sira mos kontinua  nafatin hala’o servisu ne’e.(rys)

Leave a Reply

Your email address will not be published. Required fields are marked *