Tribunal Seidauk Autoriza Arguida Emilia Ba Tratamentu

Timoroman.com- Prokurador Jeral Republiku (PJR), José da Costa Ximenes hateten, Tribunal seidauk autoriza arguida Emilia Pires (eis Ministra Finansas) hodi ba halo tratamentu saude iha rai liur, tanba la iha pedidu kona ba ida ne’e.

Publiku tomak hatene kazu ne’ebé invovle arguida, Emilia Pires (eis Ministra Finansas) daudauk ne’e iha ona prosesu justisa nia laran, maibé Tribunal seidauk fó kondenasaun.

Prokurador Jeral José da Costa Ximenes hateten, Tribunal halo ona julgamentu ba kazu eis Ministra Finansas, Emilia Pires maibé seidauk iha desizaun husi Tribunal katak, arguida Emilia Pires sala ka la’e, tanba prosesu julgamentu para atu rona deklarasaun ikus husi arguida, maibé nia (red-arguida Emilia) la marka prezensa.

Mesmu nune’e, Tribunal sei fó tan tempu ba nia (red-Arguida Emilia) para bele mai entrega ninia pasaporte. Uluk nia (red-Arguida Emilia) aprezenta ninia pozisaun hodi ba tuir enkontru G7+ iha estranjeiru entaun Tribunal autoriza, maibé Tribunal nunka autoriza nia (red-Emilia) atu ba halo tratamentu saúde, tanba la iha pedidu kona ba ida ne’e.

“prosesu ida ne’e iha Justisa nia laran, ne’e duni ita hein no ita iha mekanizmu legal balu ne’ebé ita prepara karik nia (Emilia-red) la mai, maibé espera katak nia sei mai.”dehan Prokurador Jeral, José da Costa Ximenes ba Jornalista sira hafoin remata sorumutu ho Prezidente da Republika Taur Matan Ruak iha Palasiu Prezidente Ai-tarak Laran Dili, Tersa-Feira (08/11).

Prokurador Jeral haktuir, iha mekanizmu no prosedimentu legal atu hare ba kestaun ne’e, se bainhira nia (Emilia-red) kontinua la mai, maibé Ministeriu Publiku (MP) labele ko’alia tomak ninia estratejia ba prosesu ida ne’e.

Prokrurador Jeral mós konsidera katak, arguida Emilia Pires la marka prezensa iha julgamentu ikus hodi hato’o nia deklarasaun ba Tribunal ne’e hanesan dezovidensia ida.

“Pedidu balu mak ita husu ona katak, ida ne’e hanesan desobidensia, tan ne’e ita hare para loke prosesu seluk ba kestaun ne’e.” tenik Prokurador Jeral ne’e.

Responde kona ba atu hasai mandadu kapturasaun ba arguida Emilia Pires, Prokurador Jeral, José da Costa Ximenes ho lian badak hatete “ buat hotu iha ninia prosedimentu rasik, nee duni ha’u labele ko’alia profundamente kona ba ida ne’e.

Prosesu Julgamentu Lalais ka Neneik, Tribunal Mak Desidi

Responde kona ba ejizensia husi publiku ne’ebé kestiona kona ba prosesu julgamentu ba kazu balun ne’ebé ninia prosesu lalais no kazu balun ninia prosesu tarde, ProkuradorJeral, José da Costa Ximenes hateten, prosesu julgamentu ba kazu sira ne’e depende ba Tribunal, tanba Tribunal mak bele deside.

“Ha’u hakarak klarifika katak, depois de Ministeriu Publiku (MP) konklui hodi halo akuzasaun ba kazu ida, entaun prosesu ne’e la’os Ministeriu Publiku mak dirije ona, tanba ami nia kompetensia hotu ona, tanba Tribunal mak marka julgamentu.” esplika José da Costa

Nia hatutan, bainhira kazu balun julga lalais ne’e depende ba Tribunal no kazu balun to’o ohin loron seidauk iha julgamentu mós depende ba tribunal, tanba data julgamentu Tribunal mak bele deisde.(ViQ)

Leave a Reply

Your email address will not be published. Required fields are marked *