Tinan 25 Masakre Santa Krus, Joven Tenki Luta Hodi Liberta Povu

Timoroman.com- Komemorasaun Masakre Santa Krus ba dala rua nulu resin lima (tinan 25) iha loron 12 Novembru 2016, Primeiru Ministru (PM), Rui Maria de Araujo husu ba Juventude tomak atu luta dala ida tan hodi liberta povu.

Tuir Komunikadu Imprensa ne’ebé Diariu Timoroman asesu husi Gabineti Primeiru Ministru nian katak, Primeiru Ministru (PM), Rui Maria de Araújo husu ba juventude sira tenke hamutuk hakat ba oin atu liberta povu no lori dezenvolvimentu mai Timor laran tomak.

“Ita hein katak iha selebrasaun Masakre Santa Cruz ba dala 25 no loron nasionál juventude tinan 2016, ita hotu bele hetan inspirasaun, forsa no aten-brani atu hakat ba oin, liberta ita nia povu no lori dezenvolvimentu mai Timor-Leste laran tomak.” mansajen ne’e PM Rui hato’o liu husi komunikadu imprensa , Tersa Feira, (8/11).

Lori Governu Timor-Leste nia naran Primeiru Ministru hato’o parabéns ba joven Timor-oan hotu ne’ebé uluk dedika sira nia a’an tomak ba libertasaun Patria no fó votus Timor oan sira ne’ebé aten-brani hodi partisipa ativamente iha konstrusaun nasaun, konstrusaun Estadu no iha esforsu nasionál atu luta liberta povu husi mukit no ki’ak.

“Iha loron 12 Novembru tinan ne’e, ita selebra bad ala 25 Masakre Santa Kruz no iha loron ida ne’e Estadu Timor-Leste foti sai nu’udar loron Nasionál ba Juventude.” esklarese PM Rui.

Nia haktuir, iha tina 25 liu ba joven barak, sai husi sira nia konfortu pesoál no hatudu sira nia aten branihakat ba oin hodi dezafia ambiente opresivu, represivu no intimidadór ne’ebé okupante Indonésia sira hamosu, nu’udar esforsu atu dezenkoraja vizita Delegasaun Parlamentar Portugueza, ne’ebé tuir lolós, vizita Timor-Leste iha tempu ne’ebá hanesan parte atu buka solusaun politiku-diplomatiku ba kestaun Timor-Leste nian, iha ambitu Nasoens Unidas.

Ambiente opresivu, represivu no intimidadór ne’e, hetan forsa liu tan iha Dili laran, ho asaltu ne’ebé militar Indonésia sira halo ba Igreja Motael iha madrugada loron 28 Outubru 1991 hodi oho mate, Sebastião Rangel Gomes, hakanek jovem sira seluk, hadadur no tortura sira seluk tan, husi jovem lubuk ida ne’ebé hamahan a’an iha Igreja Motael nia laran.

Iha loron 12 Novembru 1991, juventude Timor oan hamri’ik no dezafia okupante Indonesia hodi hatudu ba mundu katak, sira la ta’uk, sira la hakiduk no sira prontu atu hakilar ba mundu tomak katak iha Timor-Leste funu sei nafatin, no Timor-Leste hakarak duni ukun-rasik-a’an, maski okupante Indonesia kontinua intimida ho forsa no kilat.

Korajen ne’ebé jovens 28 Outubru no 12 Novembru sira hatudu iha tempu ne’ebá, sei nafatin relevante iha prosesu konstrusaun Estadu, konstrusaun nasaun ba libertasaun povu ne’ebé oras ne’e daudaun Timor-Leste hala’o hela.

Timor-Leste presiza Timor-oan ne’ebé iha korajem atu husik ninia konfortu pesoál, Timor-oan ne’ebé hakarak entrega nia a’an hodi buka solusaun ba dezafiu hotu ne’ebé ita enfrenta iha prosesu libertasaun povu no Timor-oan ne’ebé banati tuir jovem sira ia 28 Outubru ho jovens sira 12 Novembru ne’ebé entrega sira nia a’an tomak ba Libertasaun Pátria.(sal)

Leave a Reply

Your email address will not be published. Required fields are marked *