Monumentu 12 Novembru Sei Realiza Iha Tempu Badak

Timoroman.com – Tuir planu Governu Timor-Leste iha Tempu badak nia laran sei hala’o lansamentu primeira pedra ba Monumentu 12 Novembru.

Primeiru Ministru (PM) Rui Maria de Araújo hateten, iha tinan ne’e Governu sei halo lansamentu primeira pedra ba monumentu 12 Novembru nian, maibé ninia prosesu tomak komite 12 Novembru rasik mak buka modelu ida ne’ebé di’ak liu.

Prosesu ne’e lori tempu naruk no Governu aprova ona proposta, maibe la’os aprova hotu kedas, tanba modelu ida ne’ebé komite 12 Novembru aprezenta ne’e bo’ot no detailadu tebes-tebes entaun implika mós orsamentu bo’ot nomós iha posibilidade bele muda sai ema sira ne’ebé hela iha area ne’eba.

“Governu estuda hamutuk ho Komite 12 Novembru atu hare buat sira ne’e, tanba ita halo sasan hirak ne’e tenki hare mós ba ita nia relidade no hare saida mak ita bele halo. Ita iha ona konkordansia ne’e duni iha tinan ida ne’e sei halo lansamentu primeira pedra ba monumentu 12 Novembru nian.” esklarese Primeiru Ministru Rui.

Xefi Governu haktuir, kona ba moru iha oin ne’e bazeia ba proposta husi komite 12 Novembru.
Responde ba prekupasaun husi publiku ne’ebé dehan, tanba saida mak buat ne’e  seidauk la’o? Rui hateten, desizaun ne’e la’os Governu nian, tanba proposta konkreta ne’e mai husi komite 12 Novembru no sira rasik mak reprezenta joven hotu-hotu partisipa iha prosesu ne’e.

Se sira hakarak atu lembra 12 Novembru, entaun buat hotu tenki mai husi sira ne’e duni mak prosesu ne’e lori tempu naruk.

“Orsamentu mai husi Governu, maibé ha’u la hatene detailu kona ba orsamentu, tanba ida ne’e Ministeriu Obras Publiuk Transpore Komunikasaun mak hatene.” tenik PM Rui. (sal)   

Leave a Reply

Your email address will not be published. Required fields are marked *