PN Seidauk Aprova Lei Rai, RAEOA La Fó Kompensasaun

 Timoroman.com-Impaktu husi pakote Lei tolu (3), inklui Proposta Lei No 36/III (4a))-Regimi Espesial ba Difinasaun Titularidade Bens Imoves ne’ebé sei budu hela iha meja Parlamentu Nasional (PN) fó biban ba AutoridadeRejiaun Administrativa Espesiál Oé-Cusse Ambenu no Zona Espesiál Eskonómia Sosiál Merkadu (RAEOA-ZEESM) hodi la fó kompensasaun ba komunidade sira nia rai tanba seidauk iha baze legal ka Lei ba rai nian.

Sekertáriu Rejionál RAEOA-ZEESM, Arsenio Bano hateten, RAEOA seidauk bele fó kompensasaun ba komunidade ne’ebé oferese ona sira nia ba RAEOA tanba seidauk iha lei ba rai nian.

“problema rai ne’e loos duni. Maibé, tansa mak kompensasaun ba rai iha Oé-Cusse seidauk halo..? Tanba lei baze rai nian seidauk iha.” dehan Sekertáriu Rejional Arsenio Bano.

Sesta-Feira foin lalais bainhira halo audensias públikas ho Parlamentu Nasional kona ba ezekusaun OJE 2016 iha RAEA-ZEESM nomós aprezenta programa prioridades ba OJE 2017 nian.
Arsenio haktuir, informasaun ba rai nian ne’ebé rai nain sira kestiona, oras ne’e daudauk Diresaun Terras Propriedades RAEOA rekolla hotu ona ninia dadus, inklui mós ai-horis sira nian.

Relasiona ho kestaun ne’e, eis Deputadu Partidu FRETILIN ne’e husu ba Parlamentu Nasional atu halo aprovasaun Lei ba rai, hodi nune’e sira bele halo pagamentu ba komunidade ne’ebé mak oferese ona sira nia rai hodi utilize ba projetu hirak ne’e.
“antes ne’e Prezidente Autoridade ZEESM (Mari Alkatiri-read) hateten, sira ne’ebé iha titlu ba rai bele aprezenta keixa ba Tribunál no bainhira desizaun Tribunál deside rai ne’e ema nian, autoridade iha obrigasaun atu selu tuir desizaun tribunál nian.” Arsenio konta tuir.
Kompensasaun balun halo ona, liu-liu kona ba projetu estradas ne’ebé kona kona ema nia uma, loja no ki’os ki’ik sira.

Entertantu reprezentante povu iha uma fukun Parlamentu Nasional, Deputadu, Joaquin dos Santos preokupa kona ba impaktu juridiku bainhira sira aplika tiha programas polítikas ho orsamentu ne’ebé iha ligasaun ba diretus no deveres sidadaun sira nian.

“Projeitus ne’ebé haksoit liu direitu sidadaun nian karik, liu-liu kona ba rai, autoridades nia kebijakaan polítika ba problemas ida ne’e oinsá.” Deputadu FRETILIN ne’e kestiona.  (jax)

Leave a Reply

Your email address will not be published. Required fields are marked *