Konfrontu Iha Baucau Deskonfia GAM

Timoroman.com-Maski Governu fó sai ona rezolusaun hodi taka atividade Grupu Arte Marsiais (GAM), maibé grupu balun kontinua la respeita rezolusaun ida ne’e, tanba konfrontu iha fatin balun deskonfia iha involvimentu GAM.

Mesmu Komandu Jeral Polisia Nasional Timor-Leste (PNTL) seidauk simu relatoriu husi Komandu PNTL Munisipiu Baucau no ladauk hatene motivu lolos husi problema ne’e, maibé konfrontu entre juventude Suku Wailili ho Gariwai ne’ebé akontese semana hirak liu ba deskonfia iha tendensia Grupu Arte Marsiais (GAM).

Komandante Operasaun PNTL, Superintendenti Xefi, Henrique da Costa rekoñese katak, iha Munisipiu Baucauk akontese duni konfrontu entre juventude iha loron matebian, maibé polisia konsege halo atuasaun iha momentu ne’ebá.

“Prosesu ba kazu ne’e sei la’o hela no finalidade husi rejultadu investigasaun ita sei simu husi Komandu Munisipiu Baucau nian depois mak bele fó sai, ne’e duni ita hein informasaun ka relatoriu kompletu PNTL Baucau.” dehan Komandante Operasional, Henrique da Costa ba Jornalista sira iha ninia servisu fatin, Kuartel Jeral PNTL Kaikoli,  Sesta-Feira (04/11)

Nia haktuir, kona ba ema hira mak kanek no hira mak kaptura atu lori ba prosesa ne’e, Komandu Jeral hein de’it relatoriu husi Komandante Baucau.
Antes ne’e Komandu Jeral hasai ona diretiva ba Komandu Distrital sira para atu asegura situasaun seguransa iha loron matebian, maibé iha Munisipiu balun akontese problema ki’ikona mais Polisia konsege atua ho di’ak.

“felismente situasaun iha Munisipiu hotu-hotu agora la’o kontroladu nafatin. Polisia tranzitu no seguransa patrolia nian kontinua halo kontrolu hodi bele asegura nafatin seguransa ih rai laran.” tenik Nia hodi taka ninia liafuan. (anu)

Leave a Reply

Your email address will not be published. Required fields are marked *